2016年7月2日 星期六

陳花:初爲人母的藝術工作者


【交流小小訪問Mode】

















初初認識陳花,只覺得她清爽如風,來往自如,不會是 個喜歡結婚生子的女人,但,事實,她嫁給人了,事實,她還生下孩子了。所以,那天,忽然她出現在我的臉書訊息欄,馬上捉住她訪問幾句。其實,婚前只見過兩三次面,婚後根本沒有機會碰頭。

訪問她的過程,很「藝術」,時間跳來跳去,一時,她說吃緊飯,一時又話要湊仔,另一時又說問題好難答,值得出來喝杯咖啡,見面詳談。我有事了,遲些聯絡。轉過頭,她說還要遲點,等老公回來接班。起初,不少一問一答,給人支離破碎的感覺。幸好漸入佳境,過程非常愉快。



第一個問題:過去我的印象中,你是個獨來獨往的藝術工作者,但你出嫁了,還生孩子了,是什麼令你改變的呢?一定有事情發生,纔令你改變吧?


冇計劃要bb,咁有左,咪要。但係之前都有個諗法係想同呢個人共同有舊嘢咁囉。

因爲愛情?

但什麼是愛情呢?

你講嘅呢舊野,係 一生兒女債噃。
什麼是愛情?若不是愛,爲何要負上責任?


沒有想過是咩兒女債喎😂😂
如果真係有XX債嘅話,咁佢遲早都會以不同方式嚟攞吧

要把她養大,就是債啦。

沒有這樣想過啦。

咁講法,你相信命運了?

就是很單純地想同呢個男人共同有一舊嘢咁囉。

似乎乜都未想過,你不是十五六歲啊。

唔係囉,只是冇諗過要叫呢舊嘢做兒女債囉。
咁人一生遇到咁多人咁多動物,唔通全部都係債?咁咪好得人驚?
我本來有兩隻貓,有左之後其中一隻自己走左,但我自己都未知道自己有左。

算啦,不問你情感問題,不如問你對現時香港的睇法。

你想我答你乜嘢情感問題?
好似答唔到你期望的答案咁。😂

愛情與命運,你都未說出什麼來。
是了,你果個男人,係乜星座呀?

人馬座。我是天蠍,我仔是雙子。

唔怪得,天蠍總是有些東西,永留在心底的。

其實我遇到啱對象係會口沒遮攔地真心交的,即使唔熟。我有個難題呀,崑爺。我經常被天秤人困擾我,究竟點解??有冇得搞………啲天秤友好煩。我身邊好多天秤。

點煩法?

你知道嗎?我連生仔期間,也祈禱千萬不要生個天秤出來。好煩囉,唉,例如好多時佢地好像是為了某些目的才和我做朋友。但事實上佢地根本唔需要朋友。
 
這只證明在他們眼中,你是有價值。
好容易解決,來者便拒之。

對對,我就是好像要同佢地做一個踏腳石的角色證明佢地存在咁或者是證明佢地某些面向的身份這樣。

歸正題:好了,現在比未婚前快樂些嗎?

😳我未呻完……
咁梗係冇以前咁樣咁自由架喇……而家入戲院睇套戲都安排唔到啦,但是你問我是咪唔開心,我又唔係唔開心,有時反而覺得好像終於脫離父母(雖然一早就不同住),但自己有自己的家庭了,就唔想再煩那些問題。
就唔想再煩那些問題...

指乜問題?

覺得自己一路都是被父母綁住吧,做乜都是唔啱、做得唔夠好,自己生日要同阿媽慶祝(被逼)。還有很多小事

唔通結了婚,就唔使同阿媽做生日?

老實講我結左婚之後仲係有同阿媽做我嘅生日。
但生左仔就真係唔會同唔想囉。
上個月突然好大感覺覺得要俾阿媽知道大家都有自己嘅人生咁,仔女唔係圍住佢轉咁。
有左bb會從新思考好多嘢,會覺得點解以前阿爸阿媽會咁樣??好多問題都理解唔到(如果唔歸咎於星座😂)

對藝術還有那些期望?
或收窄一點,對於你自己的藝術生命還有乜期望?

覺得現在只是暫停一下,還未到時候再開始,本來未生bb前已開始停滯、找不到方向,只能以手作的方式去試東西。現在別說手作,去煮飯都未必得閒,因為我個仔經常哭鬧又唔瞓覺……但我會等,我覺得有必要以藝術方式表達嘅時候作品就會自然出來,無論幾唔得閒……
或者我其實唔係好理解所謂藝術生命………我好像將所有嘢撈埋一概就咁以生命來看……有時畫畫有時教書有時煮飯有時睡覺………

生活在香港,你仍覺得有希望嗎?

其實已經對人類冇乜希望。

如今身爲人母,做人會有一個目標吧?

其實湊細路就是挑戰多年來的價值觀,現在感覺到處都是戰場,自己也唔知點樣生活落去,幾多嘢能夠堅持?可能下一秒被人打殘。
而我本身都是很易受人影響的人,講兩講會屈服那種,但我愈來愈覺得這樣唔掂。我嘅目標係唔想成為自己都覺得討厭的那些上一輩,會不斷提醒自己唔好重複佢地嘅行為。更正:呢個其實唔可以叫做目標,而直情係我對自己許下嘅承諾。

我再煩你,再問:世上有沒有愛情?

我想是有吧。但什麼是愛情呢?

男女間之愛情可能是:一齊share, 一齊sacrifice ?

我諗有一個人肯和自己一齊經歷任何狀況即使是奇形怪狀的狀態,大家都會願意那成為經歷嘅一部分咁樣?已經是愛情吧?老實講呢一年過得太快……我望返以前啲相覺得那個不是自己🙈
未生仔之前,望返幾多年前嘅相都會覺得係同一個人
但生左之後望返舊相,就覺得已經唔係同一個人,即使只係舊年嘅相。

你明顯改變了啦

明顯😳》崑爺請指教。

以前你給我的印象,你自信得多。

我以為我從來都係自卑。
可能是因為你識我嗰時剛剛開了個花苑fan page吧…我記得同你有幾句對話……

對話?我卻忘記了,是什麼?

類似是話我自己幫自己開fan page,我話開下又唔駛死咁吧。
嘩頂好像是08年呀………!!!

我相信,一個女人生過孩子後,便變 了另外的一個自己。

另外一個自己?咁呢個自己原先有冇喺度?

有,都變左質啦。
如果我有曾經自信過,咁我想我而家的目標是再做返原先自信的自己吧。
這不是呢一刻才想出來的想法,是近來覺得真的聽太多人講太多鳩嘢。
因爲香港環境也變了許多,覺得真是需要一些自己的想法來對抗啲鳩嘢。嗯…也有可能……我判斷唔到

支持你,加油!

其實生左bb之後真係會聽好多鳩嘢,其實我覺得啲阿媽點解脾氣咁差唔係冇原因。當然聽嗰陣唔知道是鳩,但當自己慢慢發現唔係啲人咁講,而自己已經驚左一大輪,就變得好鳩。謝謝你呀崑爺!!!!

使乜咁客氣呀?快選些相來吧。 

睇到舊相,好傷心,令我諗起被人趕走,冇左studio
人生的路很長,繼續走就是了。我有時諗或者生仔就是一個實踐自己嘅機會………可能係咁。繼續租studio可能也是每天悠悠下咁過………




上一張是舊年一月拍的,幾搞笑,雨傘之後有人喺山頂貼左黃傘圖案,當時我懷孕了17周。
呀,地點是菱角山,在我家附近的山。兩張同一地點
以後每年都會影一張😂
其實今年呢張係意外有得影,嗰日都唔諗住上去,但行到去東澳有陣怪風,冇得揀之下逼左上山避風😂😂


我其實唔知答左你啲咩😂 唔好意思
訪問你,過程亂過亂世佳人,要花時間整理一下。


陳花以前的studio😭





沒有留言:

張貼留言